TI Balsthal
  • Mit öis bisch vüusitig aktiv!

  • So fühlt sich Spass an!

  • Blib fit – mach mit!

  • durchatmen, durchstarten!

  • Mit öis gwünnsch immer…

Single News

< Korbball: Laufen, laufen, laufen……
03.07.2017 11:16 Alter: 7 Jahre
Kategorie: Verein Nur diese Kategorie anzeigen:Verein
Von: Marianne Meier

Regionalturnfescht Matzendorf

Äs isch no ruehig im Thau, wo ig mi am Samschtig Morge früeh mit em Velo uf e Wäg as Regionalturnfescht nach Matzedorf mache. Ar zentrale Mäudesteu triffe ig uf mi Kampfrichter-Kollegin Regina. Grüens „Chrampfer im Isatz“-Shirt fasse u de geits ab ufe Wettkampfplatz Fit &Fun.


Letschti Infos vom Platzchef, damit mir ou alli vom Gliche rede u de steit scho dr erscht Verein isatzbereit uf em Platz. Hallo zäme, Noteblatt i Empfang näh, dr Verein uf nes paar örtlechi Bsunderheite hiwise, Schiri bereit?  u scho geit dr Wettkampf los. Pünkt zelle, is Noteblatt itrage, viu Glück bi de wytere Wettkämpf wünsche u scho steit der nächscht Verein uf em Platz. Hallo zäme …. Ou, das si ja scho üsi Turinerinne. Schnäu is blaue Wettkampf-Shirt wächsle u säuber das Unihockeybäueli düre Parcours befördere u derbi möglichscht viu Pünkt hole. Machets no guet Froue, u de heisst es wieder Hallo zäme, Noteblatt  …. Zwüschedüre bekannti Gsichter, es chüeus Alpechrüteristee vo de Coop-Hostesse wo mit üs Kampfrichter erbarme hei u de geits wyter. DSunne brännted unerbitterlich ufs Wettkampfgländ, dr Schweiss louft i ströme doch mir hei Glück, hei mir doch hinder em Fürwehrmagazin dr einzig Wettkampfplatz mit chli Schatte verwütscht.

Am haubi füfi hei ou sRegina u igs  gschafft u chöi itze säubern ou chli als Bsuecher as Fescht. Ir Turnhalle gits tolli Schoukelring u Stuffebare-Vorfüehrige sgniesse u so langsam verspüre mir ou Hunger. Uf dr Feschmeile herrscht es emsigs Partytribe u ir Feschhütte stöh scho die erschte uf de Feschtbänk u si chräftig am fire. Zfriedeni Gsichter wo me nume häre luegt, viu alti Bekannti, gueti  Musig u e wunderbare Summerabe – was wott me meh ame Turnfescht?

 

Am Sunntig tribt es mi de no eis hindere uf Matzedorf. sDessärt, Schlussvorführig u Rangverchündigung isch agseit. Dr Imarsch vom OK u de Vereinsfahne, agfühert vo üsere kantonale Fahneträgerin Bethli,  isch imposant u die verschiedene turnerische Darbietige eifach grandios. Mit em traditionelle Fahnelouf findet es beschtens organisierts Turnfescht si Abschluss. Es härzlich Dankeschön em OK vom Turnverein Matzedorf für e gross Chrampf. Es isch super gsi bi öich.

Uebrigens, mir Turnerinne hei im 1teilige Vereinswettkampf Manne-Froue dr 3. Platz erreicht. Hurra.